Sevgini ifadə etmək hər dildə fərqli duyğular və yanaşmalar tələb edir. Yapon dilində isə bu, xüsusi bir incəliklə və mədəniyyətlə bağlıdır. Bu yazıda yapon dilində sevgi sözlərinin mənalarını, ifadələrin necə istifadə edildiyini və yapon tanışlıq mədəniyyətinin unikal xüsusiyyətlərini öyrənəcəksiniz.

Yapon dilində sevgi sözləri: “Ai” və “Koi”

Yapon dilində “sevgi”ni ifadə etmək üçün iki əsas söz var: “ai” (愛) və “koi” (恋). Hər iki söz sevgi desə də, istifadə kontekstləri fərqlidir.

Ai (愛), romantik sevgini, dostlara, ailəyə, hətta əşyalara olan sevgini ifadə edir. Bu sözü müxtəlif məhəbbət növləri üçün istifadə edə bilərsiniz:

• Kawaii (kavaii) (可愛い) – şirin, sevimli
• Aişou (愛称) – ləqəb, sevimli ad
• Mederu (愛でる) – dəyərləndirmək, heyran olmaq

Koi (恋) isə yalnız romantik sevgi üçün istifadə olunur. Bu söz sevgililər, ilk sevgi kimi ifadələri ehtiva edir:

• Koibito (恋人) – sevgili
• Koiuta (恋歌) – sevgi mahnısı
• Hatsukoi (初恋) – ilk sevgi

Sevginin daha konkret birləşməsini ifadə edən renai (恋愛) isə “romantik sevgi” və ya “aşiq olmaq” deməkdir. Bu söz Yaponiyada sevgiyə əsaslanan evliliklərdə istifadə olunur və sevgini ciddiyə alanların seçimi kimi qəbul edilir.

Yapon dilində sevgini ifadə etmək

Sevgini ifadə etmək sadəcə sözlərdən ibarət deyil. Yaponiyada bunu necə söylədiyiniz əhəmiyyətlidir. Budur yapon dilində sevgi ifadə etmək üçün istifadə edilən bəzi sözlər və ifadələr:

• Sukidesu (sukides) (好きです) – “Mən səni xoşlayıram/sevirəm.” Bu ifadə sadəcə bəyənməni deyil, həm də sevgini bildirir.
• Daisukidesu (daisukides) (大好きです) – “Mən səni çox xoşlayıram/sevirəm.” Daha güclü bir sevgini və dərin bəyənməni göstərir.
• Aişiteru (愛してる) – “Mən səni sevirəm.” Yaponiyada çox ciddi bir ifadədir və nadir hallarda, yalnız ciddi münasibətlərdə istifadə olunur.

Kokuhaku (告白), yəni sevgi etirafı isə yapon tanışlıq mədəniyyətinin mərkəzindədir. Kimisə sevirsinizsə və onunla münasibət qurmaq istəyirsinizsə, bu etirafı etməlisiniz. Ənənəvi olaraq “Tsukiatte kudasai (付き合ってください)” – “Mənimlə görüş” (sevgili münasibəti) deyərək kokuhaku edilər. Bu ifadə ilə romantik münasibət qurmaq istədiyinizi bildirirsiniz.

Yaponiyada sevgini bildirən digər ifadələr

Yaponiyada “Mən səni sevirəm” demədən də sevginizi göstərə bilərsiniz. Bu ifadələr daha incə yollarla sevgini bildirmək üçün istifadə olunur:

• İşşouni itai (一緒にいたい) – Səninlə olmaq istəyirəm.
• Aitai (会いたい) – Səni görmək, səninlə görüşmək istəyirəm.
• Futari de ikou (二人で行こう) – İkimiz birlikdə gedək.
• İşşou ni ikimasenka? (一緒にいきませんか？) – Mənimlə gedərsən?

Bu ifadələr, qarşı tərəfi maraqlandırmaq və öz duyğularınızı göstərə bilmək üçün gözəl bir üsuldur.

Yaponiyada sevgililər günü və ağ gün

Yaponiyada Sevgililər Günü fərqli bir şəkildə qeyd edilir: bu gün kişilərdən çox, qadınların sevgi göstərdiyi bir gündür. Hədiyyələr, xüsusilə də şokoladlar böyük əhəmiyyət daşıyır və üç növə bölünür:

• Giri çoko (義理チョコ) – ailə üzvlərinə, iş yoldaşlarına verilən məcburi şokoladlardır, romantik mənası yoxdur.
• Tomo çoko (友チョコ) – qadınların dostlarına verdiyi şokolad.
• Honmei çoko (本命チョコ) – qadının romantik hisslər bəslədiyi şəxsə verdiyi şokolad.

Sevgililər Günündən bir ay sonra, 14 martda qeyd olunan Ağ Gün isə kişilərin qadınlara qarşılıq verdiyi gündür. Bu iki xüsusi gün, Yaponiyada sevginin fərqli bir tərzdə qeyd olunmasını simvollaşdırır.

Yaponiyada tanışlıq mədəniyyəti: Goukon

Yaponiyada tanışlıq təkcə fərdi deyil, qrup formatında da keçirilə bilər. Goukon (合コン), yəni qrup görüşləri, həm yeni dostluqlar qurmaq, həm də potensial romantik münasibətlər yaratmaq üçün ideal bir yoldur. Qrup formatında keçirilən bu görüşlər, Yaponiyanın sosial həyatının maraqlı bir hissəsini təşkil edir.

Nəticə: sevgini yapon dilində necə bildirmək olar?

Yapon dilində sevgi ifadələri mədəniyyətin incəliklərini öyrənmək və doğru sözləri seçməkdən keçir. Sevgini bildirmək üçün istifadə etdiyiniz sözlər, münasibətinizin ciddiliyini və duyğularınızı əks etdirir. Bu yazıda öyrəndiyiniz ifadələrlə yapon dilində sevgini daha doğru və maraqlı şəkildə ifadə edə biləcəksiniz.

Sizcə, hansı ifadə daha təsirlidir? Öz seçimlərinizi və düşüncələrinizi bizimlə bölüşün!

Müəllif : Gülşən Cabbarlı

(Müəllif hüquqları qorunur. Web saytda verilən hər hansı bir informasiyanın kommersiya xarakterli bütöv və ya hissəli şəkildə nüsxələnməsi qəti qadağandır. Verilən bütün məlumatlar istifadəçilərin şəxsi istifadəsi  üçün nəzərdə tutulub)